2013年1月20日星期日

終極封鎖線與一代宗師

.
大隻佬齣戲真係好睇到爆,剌激、緊張、悅目、滑稽、灰諧、溫情,欣賞滿足度比那十七年才完成、情節碎亂,悖於人情的所謂〈一代宗師〉強十倍!

奉道不可以嫁人,不可以傳功 ( 咁少林武學失傳咯 ),未聽過,我只聽過不可以吃牛肉!

張震係章子怡未拜堂嘅老公?唔知喎,王家衞冇話我知。若真係,佢咁好打,幫未婚妻搞掂張晉話咁易喇,唔怪知章子怡去奉道唔嫁人咯,條友仔都唔係男人!

一代 宗師梁朝偉劈頭一句:功夫係,一直一橫,贏嘅企喺道,輸嘅抬出去 (去劈友嗎 ),似個好勇鬥狠嘅爛仔多啲。跟住比試去溝女,呵呵,咁都應哂佢對陰桃花眼咯!

趙本山角色又可有可冇,張震角色更加係喇!

哈哈,成齣片係啲人生雋語正咯:

不圖一世,只圖一時 (即係不在乎天長地久,只在乎曾經擁有,好老蘭文化  XDDD );寧求一思進,莫求一思停 ( 咁張震呢?對未婚妻進過甚麼來了?);世間所有的相遇,都是久別重逢 (我情願睇劉德華嘅大隻佬 );最著名嗰句念念不忘,必有回響,講咩,我點鬼知你念!

呵呵,影評大讚?去讚咯,大師喎!讚佢證明自己都有大師眼光嘛,或者大家都係電影業,相濡以口水嘛,我唔係呀,拜託拜託!
.
.
.

35 則留言:

Jessica Chan 說...

一代宗師叫好又叫座喎,校長竟然......

不過d情節我都覺得亂同埋散,唔係好明,好似張子怡救咗張震之後,無交代佢兩個之間嘅關係。

除咗場景佈置華麗之外,我最鍾意雪景嗰場戲。

the inner space 說...

一睇完早場就返歸寫影評!

可惜阿諾不是我杯茶,
自從 Terminator II(T2)後,
T3也去看過但不好看,
阿諾也去了做州長!


匿名 說...

我中意睇人鬧人! 好應, 我冇睇, 應該冇資格評三評四, 但係, 個腦潛意識都係咁諗佢呢套一代巨製.
影評人愈嚟愈似國家d人大代表啦.

the inner space 說...

王家衛的更加不懂欣賞啊!

他的名被神化了,
好像嘉麟樓月餅,
話不好看不好食,
便是沒有Taste,
Cheapie 嗜悲,
唔Like 王家衛。

世純 說...

兩套都未睇過,阿諾嗰套會租碟睇,至於另外一套,應該都唔會睇喇 :)

蝸牛 說...

佢啲金句我一啲都唔覺得金,一橫一直咁戇居嘅都講得出,完全唔似人話。
佢啲戲你當係好多段幾分鐘嘅短片睇,會易接受啲。
見報紙啲讚美,又真係令人想嘔,凡事過猶不及就唔好。
從來唔欣賞阿諾,不過呢套似乎幾過癮。

l.minor 說...

我都未睇,有d猶豫,比你講一講....唔.....

佛爺 說...

校長:

即係咁,哲學家尼采,人生最後果十年,在精神病院渡過,但佢好可能已經一早黐佐.王家衛的功力同尼采差好遠,不過,有一樣野,佢應該同尼采相同,就係早已經Short Q佐.嘻嘻!

匿名 說...

佛爺, 唔會既, 聽講王生計數好叻好精的, 癡線佬係冇邏輯架.

魔術師 說...

//對未婚妻進過甚麼來了?

男人對未婚妻「進」甚麼,還用問嗎?

laulong 說...

J:

叫座,但並不全面叫好,我大仔都話網民評價並不高。




inner:

今次絕對唔係Terminator 嗰種超現實,不過英雄主義就梗有!




匿名:

影評人愈嚟愈似國家d人大代表啦….

哈哈,哩句好應!!!!




inner:

唔Like 王家衛唔 cheap, 咁 like 嘅係咪 cheap 就唔敢講咯 XDDD

香港人就係一窩蜂,崇拜名牌,人云亦云,獨立思考真係得個講字!

laulong 說...

世純:

另外一套唔睇,應該咯 XDDD




牛兄:

我同你所見略同。舉世混濁,踢爆是忠於自己!




minor:

那戲肯定名大於實 XDDD




佛爺:

妙絕妙絕,癲咗嘅人,仲有咁多人捧,可見癲人真係好多!

laulong 說...

12:27匿名:

錙銖必較,計數好叻嘅其實都可能係一種癡線佬!




魔術師:

道德塔理班話唔准「進」, XDDDD

匿名 說...

劉郎, 你究竟係做乜哩既? 唔好答我社會中學副校長呀!

新鮮人 說...

兩套都無睇,
無意見呀,
不過好少見你為套戲咁好火,
果然壯馬有火呀。

laulong 說...

haha, 係老馬有火 :)

最憎欺世盜名之輩!

the inner space 說...

今日讀到有則影評鱔稿說阿諾出戲個導演是位韓國仔!

laulong 說...

呵呵,咁叻?我近來都韓國熱 ^^

佛爺 說...

匿名12:27:

黐線佬係有邏輯架!問題係你是否理解他的思維方式而已!猶如王家衛拍的電影咁,睇完係戲院行出來,嘩!半夜三更都覺得一天光哂。因為,佢既心境和邏輯,要同佢一樣的心態,至明白佢既黐線邏輯囉!嘻嘻!

唔好意思,社會心理學有言,群體跟個人一樣,可以黐線的.點解有人話王家衛好野呢?因為,有某些群體,癡癡呆呆,坐埋一檯囉!嘻嘻!

唔好鬧我呀!唔信,你去圖書館,拿本社會心理學入門出來睇下喇!阿彌陀佛!善哉!善哉!

匿名 說...

校長, 我想講, 點解D學者同校長話跨境學童唔可以安排跨區返學, 因為咁會違返公平原則同埋會受司法挑戰?

但我所理解, 係呢班學童根本就在香港18區以外居住, 佢地根本亦唔應該劃入北區管理, 佢地冇得話入唔到北區讀書係唔公平的, 呢個亦冇法理依據喎?

校長, 你講吓喇.

laulong 說...

2:29匿名:

我都唔知你係邊個,做乜話你知 >.<




佛爺:

癡癡呆呆,坐埋一檯囉,我就係坐隔離檯唔過眼嗰個咯,好惡心,好想嘔,頂唔順!




12:08匿名:

我睇咗篇文咯 XDDD

我對特區教育政策已經完全死心,班廢人實在太廢!

不過派位確係有一個原則,就係「就近入學」,跨境童被派到北區以外返學(除非北區完全可學校),係會違反哩個原則。問題係法律上佢地係香港人,可以享有香港的資源,而佢地住喺香港境外不代表佢地喪失香港人的權利。

匿名 說...

我細個時住果條老村, 有間轉營中途戒毒所既舊校舍最近都有教署既職員入嚟視察, 哎, 人地都轉哂用途啦, 乜教署唔知既咩?

其實, 6年後係咪真係冇哂呢D雙非小一派位問題架?

laulong 說...

真係冇哂呢D雙非小一派位問題?

該唔會咯,班官冇 view 冇 power!

匿名 說...

諗起曾蔭權和孫明揚就嘔心, 呢D問題點會預見唔到? 凡事都應以最壞情況作打算, 佢地點可以當只有小部份雙非來港讀書既呢, 成班都係尸位素餐!

laulong 說...

haha, 廢契係乜,係好廢嘅契弟咯!

啲雙非童要喺香港出世,真係貪香港醫院貴咩,唔瞄凖香港教育、醫療、社福優勢同好處?唔好癡人説夢、自我感覺良好喇!

貪曾條友上場時有七成支持率,即係話如果普選,佢 win 梗,合曬民意,結果點?佢就係最不堪最鬼奸狗嘅特首,可見訴諸民意的普選係幾咁唔可靠!

五珍 說...

仲諗住等水尾去睇,而家諗真啲先。

laulong 說...

可以睇吓的服裝,佈景咯,40年代嘅妓寨係咁,都係一個研究嘅!

匿名 說...

雖然話王家偉D鏡頭好靚, 但我覺得有個妓女排排企既畫面無論構圖,用色或情調都好有陳逸飛士女圖系列D feel, 而陳逸飛呢批士女圖又俾我一個好似達文西拉斐爾等知名文藝復興畫家既作品(我唔識藝術, 如有錯誤請批點), 當王家偉再用呢套既時候, 我覺得那裡表現的美已經大打折扣了 (有一種很陳腔濫調的感覺).

laulong 說...

認同。陳腔濫調仲包括處理梁朝偉同張震兩場各自嘅打戲,都係濕立立,唉,冇橋喇嗎?

至於那些妓女,好病態,有啲似鬼!

匿名 說...

劇中張智霖才是章子怡未婚夫!!!張震跟葉問沒有關係!!!只係章子怡在火車上遇到他!王大導每次拍片都要五年以上,拍了4個鐘的片,剪到2個鐘上映,支離破碎,大家都睇唔明,才是王大導特式.

哥斯拉

匿名 說...

拍咁耐先至幾個鏡頭, 隨時之前拍咗咩, 係咩心思, 都唔記得哂LU, 所以, 先至有咁支離破碎既效果.:)

laulong 說...

斯拉:

吓?報紙上唔少人咁寫架,完來係亂噏補鑊!

支離破碎就係大導特色,即係壞男人話賤就係佢特色,唉!




匿名:

咁鬼懶,就咪鬼拍咯,唉,不過大師實賣喇,放屁都有人讚香 XDDD

匿名 說...

"我覺得有個妓女排排企既畫面無論構圖,用色或情調都好有陳逸飛士女圖系列D feel, 而陳逸飛呢批士女圖又俾我一個好似達文西拉斐爾等知名文藝復興畫家既作品"

校長, 關於呢點你唔應我, 又唔指教我, 好在今日萍果日報專欄個畢明寫咗篇影評, 都有提到D境頭有達文西feel, 我立時覺得自己既文藝意識番哂嚟囉.

匿名 說...

更正, 係文藝氣息!

laulong 說...

我有覆架!

但油畫哩家嘢我唔在行,唔敢教咯!

而我真係覺得個班小姐似鬼咯!